À Henri Guillaume
Cafougnett’, dins s’ jeuness’, manquot souvint d’ conduite.
I buvot comme un tro et f’sot des dett’s partout…
Un jour, dins un café, i rintre, d’un air timite,
I n’avot pus un liard et n’étot point cor saoûl.
Des messieurs juott’nt à cart’s, et Cafougnette, bin vite,
S’adresse à un gros riche au collet à minous, –
Un minton à gradins boursouflé d’ graisse à frites :
« Eh ! l’homm’, cha n’ vous f’rot rien dé m’ prêter quarant’ sous ? »
L’homm’, fier comm’ s’il arot invinté l’ noir’ tablette,
Répond à Cafougnett’ dé s’ voix grasse ed’ prélat :
« Moi, vous prêter d’ l’argent ? mais jé n’ vous connais pas !
— Ch’est justémint pou cha, qu’i répond Cafougnette,
Qué ch’est à vous surtout qué j’ préfèr’ m’adresser :
Tous les ceux qui m’ connott’nt, i n’ veutt’nt point m’in prêter ! »
Jules Mousseron