À Aimé Blaise
Chaqu’ jour, à l’accrochach’, les mineurs s’interpellent.
A l’armonte, à l’ descent’, les post’s i s’arnouvellent.
Les porions donn’nt des ordr’s, tout l’ mond’ parle in mêm’ temps :
Hiercheux et galibots blagu’nt et corsent l’ boucan.
Ch’est bien pus pir’ souvint qu’au marché au fromache :
V’là un tour qu’i-a cor eu Cafougnett’ dins c’ d’allache :
Batisse, s’adressant à Cafougnette :
— Eh ! Zeph, t’ verras t’ t’à l’heure à l’interr’mind D’siré ? »
L’ porion, s’adressant à Cafougnette in mêm’ temps :
— Eh ! Zeph, t’ f’ras attintion : el tuyau i-est crévé ! »
Cafougnett’ lieu répond sans pinser à mal faire :
« L’ tuyau i-est crévé, bon ! A queulle heur’ qu’in l’interre ? »
Là-d’sus l’ porion disput’, croyant qu’in s’ moquot d’ li.
L’innochint Cafougnett’ n’y-a jamais rien compris !
Jules Mousseron