Récolte miraculeuse

Message d'erreur

User warning: The following module is missing from the file system: acquia. For information about how to fix this, see the documentation page. in _drupal_trigger_error_with_delayed_logging() (line 1156 of /home/cafougne/cafougnette/includes/bootstrap.inc).

À Maurice Ruffin

Comm’ Cafougnette i-armet del tierre
Et qu’i l’ cultiv’ cor assez bin,
Pou li avoir des gros peun’s-tierre
Y-arniquell’ toudis à s’ gardin.

L’autr’ jour, - l’ conseil n’est point baroque, -
In li-avot dit d’ mettr’, comm’ fumier,
Un bout d’étoffe, un morciau d’ loque,
Dins chaqu’ motte’ dûss’ qu’i d’vot planter.

Cafougnett’, fin contint d’ l’arcette,
S’in va cacher des vieux chiffons.
Chaqu’ jour y-in ramasse eun’ mand’lette
Dins les moncheaux d’ chindr’ du coron.

Et quand Zeph plant’ ses pétotes
Sitôt passés les derniers froids,
Il instiqu’ sous tierre, à chaqu’ motte,
Un bout d’ loque comme un Riz-Lacroix.

I s’ dit : « In va vir queu nouvelle ! »
Et i n’a point planté d’ huit jours
– Qu’i faich’ biau temps au bin qu’i gèle –
Qu’ dé s’ gardin, l’ matin, i fait l’ tour.

Infin i vot pointer l’ verdure.
L’ brav’ Cafougnette i s’ réjouit.
Comm’ les feuill’s sont sont d’eun’ bell’ vénure,
Es’ figure all’ s’épanouit.

Les Pâqu’s arriv’nt dins l’intervalle,
Et l’ Zeph i met sin grand gilet
Pour d’aller trois jours à l’ noc’ Chales, -
Un d’ ses cousins, dins l’ Pas-d’-Calais.

S’ femm’ fait s’ lessiv’ pindant c’ voyache,
Et s’ sert du gardin comm’ curoir.
Quand Cafougnett’ r’vient du mariache,
S’ parc ed’ peun’s-tierre i-est plein d’ mouchoirs.

In arrivant, s’ première affaire,
Sans mêm’ r’tirer s’ capiau-montant,
Ch’est d’aller vir à ses peun’s-tierre.
S’ parc i-est couvert ed’ carrés blancs :

« Eh bin ! Cha va ! cri’ Cafougnette.
Ah ! ch’est des mouchoirs qu’i-a poussé !
C’ cop-chi, femm’, not’ fortune est faite.
J’ les conserv’ pou les arpiquer.

Si d’un bout d’ loqu’ qui s’effiloche
In obtient d’ parels résultats,
In r’plantant ces mouchoirs dé poche,
L’anné’ qui vient, j’arai des draps ! »

Jules Mousseron