L’avaricieux

Message d'erreur

User warning: The following module is missing from the file system: acquia. For information about how to fix this, see the documentation page. in _drupal_trigger_error_with_delayed_logging() (line 1156 of /home/cafougne/cafougnette/includes/bootstrap.inc).

El cinsier Jean Ecrepsalière,
Ch’est un avar’, mon Dieu ! ma mère !
I n’ donn’rot point par charité
L’iau dins l’ quell’ i fait cuir ses eués.

I cang’ chaque instant d’ domestique. -
Ces pauv’ gins dévén’rott’nt étiques
S’ils demeurott’nt là, pus longu’mint
A minger si peu leu contint.

Mais il a eu l’ farç’, l’aut’ sémaine.
I n’ s’in vant’ra pas l’ vieux sans-gêne,
Du tour fin drôl’, mais point vicieux,
Qu’in li-a fait à ch’ l’avaricieux.

Doncque, c’ jour-là, comm’ d’habitute,
I-avot du nouviau dins s’ cahute,
Un domestiqu’ vénot d’ quitter,
Un autr’ vénot dé l’ rimplacher.

Après eun’ grand’ journé d’ fatique,
L’ nouviau pauv’ diape ed domestique
S’ mettot à tabl’ : dins cheull’ mason
In mingeot à l’ tabl’ du patron.

Dins les assiett’s, in derche el soupe.
Y arot fallu s’ servir d’eun’ loupe
Pour vir les yeux que l’ soupe avot.
Ch’ n’étot qu’ quéqu’s légum’s et dé l’iau !

L’ domestiqu’ fait eun’ drôl’ figure,
I véyot bin eun’ pièche de burre,
Mais l’ patron l’avot tout près d’ li,
Et semblot dir’ : « Ç’ burr’, ch’est pour mi. »

L’ cinsier in prind eun’ tiot’ milette
Et toull’ comme i faut dins s’n assiette.
Notre ouverrier, in véyant cha,
Li dit tout en faisant l’ bêta :

« — Pourquoi, patron, vous mettez c’ crème
Dins vot’ potach’ ? Ch’est drôl’ tout d’ même ! »
L’ patron li répond sans rougir :
« — J’ mets ç’ burr’ dans m’ soup’ pou l’ réfroidir. »

Là-d’sus l’ domestique’, qu’a d’ l’allure,
Impoigne à plein’ main l’ pièche ed burre
Et l’ jette dins s’ soup’ tout d’un seul bloc.
In keïant d’ dins, l’ burre i fait floc !

« — M’ soupe all’ brûlot, voyez not’ maîte !
Et si j’ mets tant d’ burr’ dins m’n assiette,
J’ vous d’mand’ pardon ; mais, pou m’ santé,
J’ dos minger m’ potage ingélé ! »

Jules Mousseron